ДаьттагIа бода никъ Iобуллаш латт

Из ба ДаьттагIа бода цIи хеза никъ. Барайтта километр жагIа тIа гIолла бода, Галашка —Юрта оагIорахьара хьалболалуш бола никъ чIоагIа хала бар наха а, машенаца водачунна хIаьтте а. Каст-каста из толхабора догIаш делхаш моттигаш нийсъелча, лакхера кхертIой чухьедаш, бIарчча никъ дIалаьце гувний оагIонаш Iоювлаш моттигаш хулар. Цунца дувзаденна вахаре мел эшаш дола хьалаш а доацаш нийслора — свет, газ иштта кхы дIахо дар а.

Хьахетаргахьа, уж халонаш тIехьа юссаргъя хIанзчул тIехьагIа. Дукха ха йоаццаш ДаьттагIа бода никъ тоабара аьнна, дIадоладаь балхаш сихонца дIахьош да.

Юрта администраце кулгалхо волча Хайринаькъан Вахас яхачох, юртхой цу наькъага хьежаш бола дукха ха яр, уж шоай цIеношта гаьна баьхаб, Нохчашкахьа этта хинна тIема хьалаш бахьан долаш. Цхьабакъда уж мел гаьна мара ца бахарах, шоай хьамсара юрт цIаккха а йицъеш хиннабац, каст-каста боагIаш бар юртах бIаргтоха. ХIанз Iобуллаш болча наькъо таро хулийтаргъя цар шоай цIеношка эшаш йола гIишлон материал хьатIа я а, цIеношка кулг тоха а. Из доацаш а укхаза таро хургъя дIахо йодача хана туризм дегIайоалае. Дукха хоза моттигаш а, иштта цIена фо а да укхаза. Цул совгIа балхара мукъа волча деношка салаIара хоза моттиг я ер.

Никъ Iобуллаш дола балхаш дIахьош мара деце а укхаза баьха нах хьаухаш ба юртага сатесса. ВIалла са ца лоIаш лакхача наькъа тIа урагIа ух жагIа а гIум а тIайола машенаш, сихача хьале наькъ тIа гIолла дIа-юха боаржабеш ба баласт.

Дукха ца говш Iобилла керда асфальт гургба вайна укх даькъа тIа, ГIалгIайчен хозагIа йола оагIув хьаелларгъя цо.