«Говзанчаш 2026» яхача чемпионате котбаьннарашта совгӏаташ делар
Гӏалгӏай мехка совгӏаташца безбир, «Говзанчаш 2026» яхача балхаца ювзаеннача мехка чемпионате котбаьннараш, яхаш, дийцар «Сердало» газетага ГӏР цӏерца къовсам лоаттабара колледжа администраце.
«Яхьаш дӏахьош хиннача юкъа доакъашхой таро йолаш бар тоабан денал, духьалъотталуш хилар, физически низ гойта. Уж йистейоалаш, лаьрххӏа совгӏаташ делар берригача доакъашхошта, цар хьехамчашта, иштта дикагӏа шоаш гойта бераш хьакхайкадир. Майдилгаш, дипломаш, баркал оалаш дола каьхаташ даларо хьагойт цар начӏал хилар», - аьлар хоамо.
«Шо тха доаккхал да, кагирхошта, хургболча говзанчашта дика масал да. Аьттув хилба шун керда толамаш даха. Керда, кхы а лакхагӏа толамаш дахара кӏийле хийла шоана ер чемпионат, укхаза оаш ӏомадаьр дӏахо а накъадоалаш хилда шоана. Баркал шоана ер чемпионат йицлургйоацаш кечъярах»,- аьлар чемпионата доакъашхошка колледжа кулгалхочо Мархенаькъан Мусас.
