Сов сиха машин хехкаш лийннар, соцавир Магасерча полице болхлоша
Даггара кхайкарал деш латт Магасерча ГАИ болхлоша бахархошка, боккъал а машинаш сабаре лехка, шоай а шоашта уллуврча наьха а уйла е ехаш. Хьалхадоах, боарамал тӀехваьнна машин хехкаш лелачунна бехк бергболга. Из иштта долга кхетадир, каьхаташ доацаш, геттара михьарваьнна, машин хехкаш лийннача Наьсарерча 20 шу даьннача зӀамигача сага.
«Магасера ГАИ болхлой «Лада Гранта» яхача машенаца воагӀа вахархо соцаве белар, бакъда вож саца лаьрхӀа воацаш, къайлаэккха хьежар. Интернете массанена гуш да из хӀама тахан. Дикка машин хийхакачул тӀехьагӀа Магасерча цхьан урам тӀа, ваха моттиг йоацача кхоачаваь, соцавир из саг», - хоам бу «Сердало» газетага МВД.
Ӏаьдала болхлошта новкъарле яь машин ший да тӀехьа Ӏочуйигай ГАИ. Дикка гӀод ца тохаш, вусаргвац из саг укх наькъа.
