ГУП «Ингушавтотранс» оагӏон пайда шозза дукхагӏа ба тахан
Шозза лакхбенна, бетта 3,2 млн сома тӏа латт ГУП «Ингушавтотранс» оагӏонна хулаш бола пайда. Вай мехкадас Келаматанаькъан Махьмуд-ӏаьлас белгалдечох, болх боаггӏача боараме хьаоттабарах гуш дола хувцамаш да уж.
Пайда ца беча рейсашта, уж лелае 2,8 млн сом ахча лу. Таханарча дийнахьа болх дӏахьораш 31 маршрут я, бахархой дӏа-хьа кхувлаш.
«Цхьацца йолча моттигашка дӏа-хьа ухаш бола нах кӏезига хиларах, юрташ сов гаьна ядаш хиларах, хьадоаккхачул дукхагӏа дӏадодаш хул ахча, хӏаьта а уж маршруташ массахана йолаш хургья, хӏана аьлча, наьха керттерча шахьарцара цаӏ мара боаца бувзам ба из», - белгалдир вай мехкадас.
Республикан кулгалхочо теркалдир, бахархой дӏа-хьа кхувлаш бола болх боаггӏача боараме, наха хало хургйоацача тайпара хьаоттабаь хила безилга.
