Яндарера дзюдоисташ 1944 шера къам мехкахдаккхара дагалоаттама яхье котбаьлар
Яндарера 11 дзюдоист котваьлар, ондаргашта юкъе дӏахьош хиннача йийллача яхье, из хетаяь яр 1944 шера гӏалгӏай къам мехкахдаьккха 82 шу далара, яхаш, дийцар «Сердало» газетага спортсмений викалаша.
«Яхьаш дӏахьоча юкъа доакъашхоша гойтар лоӏам, духьалъотталуш хилар, говзал. Доакъашхошта лоархӏаме дар майдилгаш яхарал совгӏа, цу дагалоаттама кхетачене котало яккхар. Яндарерча «Чемпион» яхача физкультурно-унахцӏенон комплексе ӏомалуш бараша совгӏаташ даьхар. Котанаькъан ӏийсас хьалхара моттиг яьккхар.
Оздой Мухьмада, Султиганаькъан Мухьмада, Котанаькъан Мухьмада, Шахмарзанаькъан Халита, Котанаькъан Мусас, Мержой Мухьмада дото майдилгаш яьхар. Коазой Ювсапа, Мержой Ахьмада, Шахмарзанаькъан Саӏида, Коазой ӏусмана кхоалагӏа моттиг яьккхар», - аьлар хоамо.
