Тишъенна 7 км хин турбаш хувцаргья мехкарча «Цаӏ волча оператора»
Хин хьал меттаоттадеш болх ба мехка дӏахьош. Ер шу чакхдалалехь, 7 км кхоачаш тишъенна хин турбаш хувца лерхӏ «Цаӏ волча оператора».
Оттаяьча программага хьежжа, дӏахьош ба болх. Бахархошта боаггӏача боараме хий лоаттадергдолаш, къахьег тахан мехка. Укх шера доккхий балхаш дӏахьоргда Магӏалбике, Наьсаре, Пхьилекъонгий-Юрта, Аьккхий-Юрта, Дабе-Юрта.
Мехкадаь зарбан болх лелабераша белгалдечох, ер шу доладелча денз меттайоалаяьраш 21 км кхоачаш хин турбаш я. Вай Мехкадас белгалдир, хин хьал тоадар эггара керттерча декхарех долга. Къаьстта дика хувцамаш гуш да «Цаӏ волча оператора» болх хьаоттабарца.
«96% хин-канализационни моттигашкара болх тоабеш къахьийгад, дукха турбаш я хийцараш, хин турбаш лийлха, цхьацца хатараш хиннача 3 эзар совгӏа моттиг тоаяьй, керда насосни станцеш хьалъяьй мехка», - белгалдир вай Мехкадас.
Тӏадоагӏача шера 286 млн сом мах бола болх ба цу оагӏонца чакхбаккха лерхӏар.
