«Говзанчий мохк» яха кхетаче дӀахьоргья кхаь дийнахьа
«Говзанчий мохк» яха халкъа кхоллама къамашта юкъера кхетаче дӀахьоргья тов бетта 28-ча дийнахьа денз 30-ча денга кхаччалца, Магас- Шахьара керттерча майдан тӀа, яхаш, дийцар ГӀалгӀай Республикан кагирхой политикан, туризма зарбан болх лелабераша.
ГӀалгӀай паччахьалкхен 100 шу дизара хетаяь кхетаче дӀахьош, Россе тайп-тайпарча моттигашкарча говзанчаша даь балхаш хургда. 100 гаргга говзанч-хьехамаш дергда тайп-тайпара кулгаговзал гойташ. Гойтамаш, презентаци хургья, шийна цу даькъ тӀа фу карагӀдоал а хьажа йиш я цига моллагӀа волча сага.
ГӀалгӀайчен 100 шу дизара цӀай дездеш, дукхагӀа терко тӀайохийтаргья къаьстта вай культура, гӀалгӀай къаман истори вӀашагӀделлача денз хьадоагӀача Ӏадаташта.
Вай юкъара декхар - Ӏадат, культура лораяр, вай даьша лораяьча беса. Цудухьа лоархӀаме да вай кагирхой халкъа начӀал долаш кхебар, из цар шоай дезалга кхоачийташ лорадар», - аьлар ГӀалгӀайчен кулгалхочо Келаматанаькъан Махьмуд-Ӏаьлас, из кхетаче ювцаш.
