ГӏалгӀайчен Кулгалхочо 15 шу даьннача йиӀига совгӀата чӀондарг елар
Лайчилла бетта 19-ча дийнахьа, «Нахацара къамаьл» яха передача дӀахьош; ГӏалгӀайчен Кулгалхочунга дехар дир 15 шу даьннача Дзовранаькъан Марияс, ший доалахьа чӀондарг хилар дезаш. Келаматанаькъан Махьмуд-Ӏаьлас тӀадиллача декхарах, цу йиӀига из совгӀат дир.
Республикан Кулгалхочун зарбан болх лелабераша яхачох, Мария мехка искусствай Центральни ишколе дешаш я, хӀанзарчоа Ӏомаяла аьнна лелаеш йола цигара чӀондарг яр цунга. Бакъда ший доалахьа из хилар дезаш яр из, да-нана из цунна эца таро йолаш дацар.
«Из ашарий дешар дӀахьош бола дезал ба - Марияй йоккхагӀа йола ши йиша дешаш я ашарий училище. ХьатӀадоагӀача шера цо лаьрхӀад царца цхьана деша», - аьлар ший вахара бувзамашка Келаматанаькъан Махьмуд-Ӏаьлас.
Цо белгалдир, цу тайпарча дешара бераш тӀакхувш хилар хьаллаца дезилга. Цудухьа дир цо Марияйна из совгӀат.
«Цул совгӀа, цун уйла я дийша яьнначул тӀехьагӀа ший хьамсарча ГӏалгӀайче юхая, моттигерча симфонически оркестре чӀондарг локхаш хила», - аьлар мехка Кулгалхочо.
