Кадетски корпуса гӀо де, аьнна, тӀадиллад вай Мехкадас
Вай мехкарча кадетски корпуса эшаш долча хӀаманга хьажа, аьнна, тӀадиллад Мехкадас Келаматанаькъан Махьмуд-Ӏаьлас республикерча Паччахьалкхенна. Цу гӀулакха эшаш дола рузкъа Паччахьалкхен ганзера хьакъоастадергда. Эггара хьалхарча оагӀонца хувца дезараш да тока бӀоагӀий, саьргаш. БоаггӀача боараме ток лоаттаергйолаш дӀахьош ба из болх.
Иштта дизельни генератор оттабергба кадетски корпусе, моллагӀча тайпара хатар хиларах, ток хургйолаш. Къаьстта йоккха терко ергья курсантий тӀабувхача гӀирса. Керда барзкъаш эца лаьрхӀад царна. «Дешара, тӀема кийчон юкъе цхьацца кердадараш юкъедоаладаь, 2022-ча шера керда бассейн бир кадеташта. Хи тӀа амал деш хургбарашта лоархӀаме да наьк де хар», - белгалдир вай Мехкадас.
Укх шера 30 шу дуз кадетски корпуса. Ше хьайийллача 2001-ча шера денз, цо арахийцав 800 кадет, царна юкъерча 200 сага тӀема декхараш кхоачашдара гӀулакх хержар дӀахо. Карарча хана, вай мехкара, Къилбаседа Кавказа моттигашкара, Санкт-Петербургера, Московски областера 413 курсант ва цига дешаш.
