ГӀалгӀайчен Кулгалхочо телевидене болхлой даькъалабийцар, Дерригача дунен телевидене денца
ХӀара шера лайчилла бетта 21-ча дийнахьа, белгалду Дерригача дунен телевидене ди. Из цӀай, 1996 шера денз, дездеш да, дунен тӀарча хоамий даькъ тӀа телевидени белггалара дакъа дӀалоацаш хиларца. ГӀалгӀайчен Кулгалхочо Келаматанаькъан Махьмуд-Ӏаьлас ший вахара бувзамашка гӀолла даькъалабийцар «Магас» НТРК, «ГӀалгӀайче» яхача ГТРК кхоллама болхлой.
«Аз даькъалаювц НТРК «Магас», ВГТРК филиал ГТРК «ГӀалгӀайче» цӀайца. Дика болх бе, чулоацам болаш программаш дӀаяхьа, дукха шоай хьажархой болаш хила аьттув хилба шун!» - аьлар мехка кулгалхочо.
Дерригача дунен телевидене ди - из юкъарча вахара Ӏаткъаш долча хьалий керттера белгало я. Укх дукхача шерашка, хоамий даькъ тӀа лоархӀаме оагӀув дӀалоацаш, хьайоагӀа телевидени, цо вӀашагӀйолл юкъара уйла. Цо адамашта шера йовзийт культура, истори, вахара- политически хьал.
