Мехка кулгалхочо белгалдир, укх тӀехьарча пхе шера, премьер-министр шийна тӀехьа волаш хьавоагӀаш хилар, республикан хьалхашка отташ дола лоархӀаме декхараш кхоачаш а деш.

«Тхо болх бе дӀадоладелча денз, чоалхане хаттараш нийсденнад тхона хьалхашка. Бакъда цхьа барт болаш хиларах, эггара халагӀа дола декхараш а кхоачашде таро хиннай.

Аз баркал оал Сластенин Владимира мехка бюджет лораярах, къаман проекташ кхоачашъярах, ца хилча яргйоаца проекташ юкъеяха таро хиларах», - язду Келаматанаькъан Махьмуд-Ӏаьлас.

ГӏалгӀайчен Кулгалхочо иштта белагалду, Сластенин Владимира балха говзал лакха хилар бахьан долаш, шийна хьалхашка оттадаь декхар цо, бехктокхаме волаш, кхоачадеш хилар.

«Массаза могаш а хьинар долаш а, хӀанз санна балха даькъ тӀа толамаш даха кийча волаш а хилва хьо.

Ираз хилда хьа а хьа гаргарча наьха а!» - тӀатехар мехка Кулгалхочо.