ГӀалгӀайчен Кулгалхочо даькъалабийцар республикан волонтёраш цар Денца
Келаматанаькъан Махьмуд-Ӏаьлас кхайкарал дир ГӀалгӀайчен волонтёрашка, ерригача Россе гӀолла дездеш долча лоӀамхочун Денца уж дег тӀара даькъала бувцаш, цо баркал аьлар царна иштта дика дакъа цар юкъарча вахаре лацарах.
Республикан Кулгалхочо белгалдир, из цӀай лоархӀаме хилар, юкъара вахар тоадара волонтёраша дукха къахьегаш хилар.
«Волонтёраш - уж моллагӀча гӀулакха кийча болаш, эшача накъабоалаш нах ба. ГӀалгӀайче 16 волонтёрий цхьанкхетар да, царна юкъевоагӀа тайп-тайпара ханаш яьнна 10 эзар совгӀа саг», - аьлар ший вахара бувзамашка гӀолла Махьмуд-Ӏаьлас.
Цо иштта белгалдир, ГӀалгӀайчен лоӀамхоша тайп-тайпарча мехкий кхетаченашка дика дакъа лоацаш хилар: гумманитарни новкъостал гулдаргара экологически боламашка кхаччалца. ЛоархӀаме да лаьрххӀа йола операци дӀахьоча тӀема мугӀарашка латтача бӀухошта цар новкъостал деш хилар.
«Баркал оал шоана адамий сакхетам лакха болаш, хьинар долаш шу хиларах!» - аьлар мехка Кулгалхочо.
