Хьехамчаш цар цӏайца даькъалабийцар Мехкадас
Хьалхалаттараш цар цӏайца даькъалбувцаш, хилар вай мехкада Келаматанаькъан Махьмуд-ӏаьла. Из хоам «Сердалога» бера мехкадаь зарбан болх лелаберашкара.
«Тушола беттацара 2-гӏа ди вай культурацара лоархӏаме ӏадат дийндеш, белгалдеш да. Советски ханашка хӏара моттиге, ишколе хиннаб хьехамчаш, иштта революци хилале Россе моттигашка лаьттад из. Из чӏоагӏа лоархӏаме гӏулакх да. Лакха говзал яраша, болх дикка шаьрбаьраша тӏехьа тӏалаттарашта деррига хьалхадаккхар хӏара моттиге эшаш да. Из гӏулакх дикка чӏоагӏдеш хилар, Россе Президента Путин Владимира амарца, дӏадахача шера из цӏай къоастадар», - белгалдир Келаматанаькъан Махьмуд-ӏаьлас.
Мехка кулгалхочо теркалдир «Цаӏ йолча Россе» из цӏай къоастадеш дакъа лацар. Единороссаша белгалдаь, РФ Къахьегама кодексе хьалхалаттарий моттиг чӏоагӏъяьй алапи хьожадеш. Цу гӏулакхо хьагойт из болх лоархӏаме болга. «Вай мехка геттара чӏоагӏа эшаш да из гӏулакх. Хьехамчаш тахан вай ишколашка къонабарашта болх дикагӏа бовзийташ, вахаре цхьа гӏулакх хьахаржа гӏо деш, дикагӏа, пайданегӏа хургдар царна хьалхадоаккхаш, довзийташ ба.
«Турпала никъ» яхача программага гӏолла доакъашхошта деррига довзийташ, болх шаьрбара тӏехьа гӏо деш ба хьалхалаттараш», - белгалдир Мехкадас. Кхыволча сага новкъостал дар, цунна дикагӏа хургдар хьалхадаккха говзал хилар доккха дика долга теркалдир цо. Дешаца, гӏулакхаца гӏо дар, хьалхара гӏа боаккхаш барашта нийса никъ хьехар, лоархӏамеча гӏулакхех да.
«Вай мехкара, иштта Россера хьехамчаш даькъалабувц аз цу цӏайца! Вай мехка кхоанен хӏама тоадара тӏехьа къахьегаш дола нах да шо тахан, аьттув хилба шун!»,- аьлар Мехкадас.
