ГӏалгӀайчен кулгалхочо кхетаче дӀайихьар, истореца дувзаденна хӀама диццадара хетаяь
ХӀХ-ча бӀаьшере гӀалгӀашта еннача байракхий лараш дахьаш, вайцига баьхкар федеральни викалаш, царца вар Россе Президента СКФО гӀолла волча викала гӀонча Надыкто Владимир, Федеральни Ганза кулгалхочун гӀонча Михайлик Александр. ЛаьрххӀа йола кхетаче дӀайолалуш, ГӏалгӀайчен Кулгалхочун вӀашагӀкхетар хилар безача хьаьшашца ший балха кабинете.
Къаьстта теркам тӀабахийтар исторически дагалоаттамца дувзаденнача дешашта. Цох дувцаш, Келаматанаькъан Махьмуд-Ӏаьлас аьлар, ший истори ца ховш дола къам, кхоане йолаш дац.
«Тахан, дукха бакъдоаца хоамаш лелача хана, лоархӀаме да истори лорадар, иштта цох дола бакъдар зӀамагӀча ноахалга кхачийтар. Исторически бакъдар эшаш да, кагирхошта вай мохк паччахьа ханашка, Сийлахь-боккха Даьймехка тӀом латташ, иштта тахан Росси лораеш хиннача турпалхоех бола хоам царна бовзийтара», - аьлар мехка Кулгалхочо.
Цу байракхий лараш деча дакъа лоацаш хиннача Михайлик Александра а из иштта хилар чӀоагӀдир, цо белгалдир исторически бакъдар довзаш хила дезилга.
Республикан кулгалхочо, ший кхетаче йистейоалаш, ГӏалгӀай Республикан Сийлен грамота елар Федеральни Ганза кулгалхочун гӀончанна, цо ГӏалгӀайчен ганз дегӀайоалаеш, дукхача шерашка къахьегарах.
Тӏатоха лов, цига дакъа лоацаш хилар иштта РФ Президента СКФО гӀолла викал ваь Валиев Айдамир, СКФО гӀолла йолча Росфинмониторинга кулгалхо Русин Алексей, ГӏалгӀай республике гӀолла вола федеральни инспектор Гудов Залим, ГӏалгӀай Республике гӀолла йолча УФК кулгалхо вола Угурчанаькъан Илез.
