Магасе хьем боацача штаба кхетаче дӏайихьар Мехкадас
Мехкадас Келаматанаькъан Махьмуд-ӏаьлас кулгал деш дӏайихьача хьем боацача штаба кхетаче дийцар, Россе Президента Амарга хьежжа декхараш кхоачашдарах. Цу кхетаче гулбенна хилар ӏаьдала болхлой, мехкарча Паччахьалкхен доакъашхой, муниципалитетий кулгалхой, иштта кхыбола лоархӏамеча моттигашкара къахьегамхой.
«Юкъара-политически оагӏонцара хьал, наьха кхерамзленца дувзаденнараш меттадоаладара балхах дийцар кхетаче. Мехкара кхерамзлен хьал чӏоагӏдара, тоадара тӏехьа кхоачашде дезараш белгалдир цига. Вай мехкадас Келаматанаькъан Махьмуд-ӏаьлас белгалдир, цу мугӏарера гӏулакхаш боаггӏача боараме хьаоттадаь хилар, тахан республикан хьалхашка латтача лоархӏамеча декхарех долга», - йоах «Сердалога» Мехкадаь зарбан болх лелаберашкара кхаьчача хоамо.
Эггара хьалхарча оагӏонца кхоачашде дезараш белгалдир гулбеннараша. Мехкахой, иштта республикера лоархӏаме моттигаш кхы а дикагӏа, чӏоагӏагӏа лораяра тӏехьа дӏабахьа безача балхаца лоархӏамедараш къоастадир вай Мехкадас.
