Гӏалгӏайчен Кулгалхо хьежар, Илдарха-Гӏалан №2 йола берий беш тоаярга
Республикан Кулгалхо Келаматанаькъан Махьмуд-ӏаьла вахар Илдарха-Гӏалий тӏарча №2 йолча берий беша, из дукха ха йоацаш цӏенхаштта тоаяьяр. Из гӏишло хьалъяьй 70-ча шерашка, хӏанз еррига а кердаяьккхай.
Гӏалгӏай Республикан Кулгалхочун, Паччахьалкхен зарбан болх лелабераша яхачох, берий беш тоаеш хийцад кораш, наӏараш, уйнаш. Цул совгӏа, керда тока саьргаш чудаьхкад, йӏовхал чуйиллай, чура ченаш тоаяьй, цӏера кхерамзлен ӏалашо яьй. Мехка кулгалхочо аларах, гонахьара доазув тоадаьд: асфальта наькъаш даьхкад, кердаяьхай берий ловзара майдаш. Уж балхаш дӏадихьар «Кагирхой, бераш» яха къаман проект бахьан долаш, цунна чудоагӏаш кердайоах республике дешара, гӏишлон, спортивни, культуран моттигаш.
«Баркал хилда гӏишлонхошта дика болх барах. Берий беш хоза а сийрда а я. Даьй-ноаной паргӏата хила йиш йолаш ба, шоай бераш хозача, дикача хьалашка долга а ховш», - аьлар Келаматанаькъан Махьмуд-ӏаьлас.
Белгалду, дешара моттигаш дӏахо а цӏенхаштта тоаеш хилар. 2026 шера кхы а йиъ берий беш а, цхьа ишкол а тоае лерхӏ.
