Магасерча Барта доазон тӏа дӏахьош долча балхашка хьожаш хилар вай Мехкада
Магасерча Барта доазон тӏа дӏаболабаь боккха болх мишта дӏабодаш ба хьожаш хилар вай мехкада Келаматанаькъан Махьмуд-ӏаьла. Барта гӏала гонахьара моттиг 13 шера яьсса уллаш яр, хӏаьта бахархошта чӏоагӏа ловра цига дезалца арабаьнна ха дӏаяхьа, салаӏа йиш йола моттиг хьаеллар. Бакъда Гуцаранаькъан Микаилаца къамаьл дича, деррига хувцаделар – «САФМАР» компане тоабо дӏатӏаийцар цу доазон тӏа таханарча ханага хьежжа хургйола моттиг хьаеллар. Цох лаьца язду тахан ший Телеграм-оагӏон тӏа вай мехкадас.
«Гӏишлон балхаш, тӏатеӏӏа, дӏахьош латт тахан, бакъда дӏахо кхоачашде дезараш а дукха да. Юххьанца дийцачох 2024-ча шера проекта болх чакхбаьнна хила безаш бар, амма болх дӏаболабича проектни декхарашца къоастаде дезараш дукха хилар, къаьстта лаьттан кӏалхарча балхашца. Деррига цӏаькха дистачул тӏехьагӏа, 86 ког-бӏоагӏа оттабе безаш хилар кӏийле чӏоагӏъеш. Болх дӏахьош йола ха йӏаьхагӏа яле а, хьалъяь гӏишло боаггӏача боараме деррига хӏама лорадаь, диста хургья. Тахан болхлошта хьалхашка латта декхар да ардара бутт хьатӏакхачале кораш дӏаоттадар, хьалхашкара моттиг дӏакъовлар, цул тӏехьагӏа чура балхаш дӏадоладе йиш хургья. Къаьстта терко еш хьежаб хица, токаца, цӏерцарча кхерамзленца дувзаденнарашка, кхуркхолгий хьалага. 5,5 эзар кв.метрага кхоачаш хургдолча лаьттан кӏалхарча доазон тӏа кинозалаш, боулинг, берашта лаьрхӏа 800 кв.метрага кхоачаш салаӏа, ловза моттиг , VR- клуб, фитнес-залаш, иштта коммерчески доазонаш хургда. Эскалатораш, гонахье дика го йиш йола лифт хургья цига. Дегӏа могашал эшаеннарашта терко еш дӏабихьаб болх. Дукха туристаш, бахархой тӏалатташ моттиг хургья цох. Цхьа кӏеззига гобаккхар доацаш, хьавена укхаза бӏарчча ди дӏадахьа аьттув хила беза сага – шахьара моттигашка хьажа, делкъар де, дезалца дог ӏаббалца паргӏатта салаӏа», - аьлар вай мехкадас Келаматанаькъан Махьмуд-Ӏаьлас.
Шахьара Барта доазон тӏа болх беш кхуркхолгаш хургда, таханарча ханага хьежжа йола гобаккха, волавала аллеяш, иштта дукха гаьнаш, зизаш. Вай Мехкадас тӏадиллад; цига йогӏаш йола гаьнаш къаьстта терко еш харжа, аьнна. Магаса юкъера моттиг мел хувцаенна хургья наха кхетадергдолаш; лакхера, лаьттан кӏалхара моттигаш йовзийташ баннераш хьалтохаргья цу доазон тӏа.
Бахархошта дӏахьош латтача балхах дувца лаьрхӏа ба мехка. 2027-ча шера тушола бетта 30-ча дийнахьа чакхбаккха лерхӏ беррига болх. Вай республикан 35 шу дизара хетадаь хоза, беркате совгӏат хургда цох. Кагирхой, бӏарчча дезалаш дега ма хетта салаӏа гуллуш йола моттиг хургья цох, къахьийга баьлча.
Мецената Гуцаранаькъан Микаила доккха баркал кхайкадеш ва мехкада Келаматанаькъан Махьмуд-ӏаьла цу проектах. Гӏалгӏайчен хӏама тоадара тӏехьа доккха дакъа дӏалаьца саг ва из тахан. Вайна массанена ма харра, лоаман моттигашкара вай даьй гӏалаш меттаоттаеш бола болх дӏатӏаийцаб цо шийна, иштта кагирхошта лаьрхӏа мах бала ца беза ӏT-дешара моттиг хьайийллай, кхыйола моттигаш тоаяьй мехка. Вай республикан таханара вахар, кхоанен хӏама тоадеш бола мах баь, хам баь варгвоаца болх ба из!
