Россе Паччахьалкхен Кулгалхо даькъалавийцар вай Мехкадас
Ваьча денца РФ Паччахьалкхен кулгалхо Мишустин Михаил даькъалавийцар вай мехкадас Келаматанаькъан Махьмуд-ӏаьлас. Из хоам «Сердалога» бир мехкадаь зарбан болх лелабераша.
«Михаил Владимирович лакха говзал йола болхло ва. Тахан шийна тӏалатта декхараш боаггӏача боараме кхоачашдеш, мехкара вахара-экономически оагӏонцара хьал тоадалийтара тӏехьа къахьегарех ва из. Цо кулгал деш, цун тӏахьожамца РФ Паччахьалкхено дӏахьош латтар боккха, лоархӏаме болх ба тахан», - белгалдир Мехкадас.
Вай регионера вахара-экономически хьал тоадара тӏехьа а цо дикка дакъа лацар теркалдир республикан кулгалхочо. «Цо оагӏув хьаллоацаш, тахан мехка лоархӏаме программаш йоаржае, дешара, унахцӏенон, иштта кхыдолча оагӏонашца керда моттигаш хьаелла, тоае аьттув ба тахан.
Дег тӏара даькъалавувц аз Михаил Владимирович ваьча денца! Могаш-маьрша волаш, дӏахохьоча наькъаца аьттув болаш, низ болаш вахалва из», - белгалду Мехкадас ший къамаьла юкъе.
