Росгварде оагӏонна кулгалхочунца кхетаче дӏайихьар вай Мехкадас
Вай мехкарча Росгварде оагӏон кулгалхочунца Буружанаькъан Микаилаца кхетаче дӏайихьар мехкадас Келаматанаькъан Махьмуд-Ӏаьлас. Росгварде кулгалхочо дийцар СВО командировка баха болча вай бӏухой хьалах.
Массехк бутт бар республикера росгвардейцаш Къилбаседа Кавказа моттигашкарча бӏухошца тӏема операци йодача доазон тӏа шоашта тӏадехка декхараш кхоачашдеш бола. Таханарча дийнахьа, цигара цӏакхаьча, мехка ба уж. Республикан кулгалхочо баркал аьлар Росгварде оагӏон кулгалхочунна, иштта берригача бӏухошта шоай декхараш боаггӏача боараме кхоачашдеш, дикача оагӏорахьа шоаш дӏабовзийташ хьабахкарах. Белгалде деза вай росгвардейцаш тӏема операци йолаеннача дийнахьа денз цу юкъе дакъа лоацаш, майралца, деналца белгалболаш хьабоагӏилга.
Вай мехкадас Келаматанаькъан Махьмуд-Ӏаьлас теркалдир, уж нах шоай декхараш дизза кхоачашде ховш, къаман яхь лораеш хьабаьхкалга. Царна юкъера цхьаццабараш паччахьалкхен совгӏаташ дала оттабаьб. Белгалде деза, росгвардейцаш эггара халагӏа дола декхараш кхоачашдеш цига лаьтталга. Кхетаче йистейоалача хана, Буружанаькъан Микаила Росгварде оагӏонгара совгӏат делар мехка кулгалхочунна.
СВО доазон тӏа российски зенитчико чуяйтача американцаша хьаяьча ракета бистах даь мукх дар мехкадаьна духьалаенар. Республикан кулгалхочо терклдир уж тайпара хӏамаш исторе лоархӏаме, шоай кхоане йолаш долга. Даьхен хӏама лорадеш латтача вай бӏухошца бувзам бола моллагӏа хӏама лоархӏаме да къаманна. «Эггара керттердар - шоай декхараш дизза кхоачашдаь, юкъера саг къастанза, лозаванза болаш, цӏенах кхийттаб вай бӏухой. Цар гӏулакхаца эггара керттердар из да сона.
Тӏемхой, цар цӏагӏарча наьха гӏулакхага хьожаш хургба мехка массахана. Тахан доаккхал де дезаш майрал, денал гойташ, шоай гӏулакх дӏахьош хьабоагӏа вай къаман къонгаш. Могаш, маьрша болаш, аьттонца, иразе бахалба уж берригаш», - аьлар вай Мехкадас къамаьл чакхдоалаш.
