«Балкхарой къаман тахан балан ди да - тушола бетта 8-ча дийнахьа 1944 шера гаьнарча Сибре, Юкъерча Азе Ӏодахьийтар из деррига къам. Цо гаргакхувл вайна юкъера гӀулакхаш, цхьана бала лайна хиларах. Балкхарой халонашта духьалъэтта, бала лайна, юха мехка баьлар, деналах ца бохаш, барт болаш, шоайла чӀоагӀа хилар гойташ. Тахан уж бахаш ба хоза тоабенна дӀаэттача ГӀаьбартой-Балкхарой мехка, цар мохк дегӀабара юкъедахь шоай дакъа. Мехка кулгалхой терко лоаттаеш ба вай моттигашта, дика вахара хьалаш вай хилар дезаш, хьалха латта технологеш, иштта дешара технологеш вай вахара юкъекхувлаш, таханарча дено дӀадеххача беса вахара аьттув вай хилийта гӀерташ. Россе Президента Путин Владимира, Къаман политика тӀаерзаяьй къамашта юкъера барт лелабара, дерригача мехкашта юкъера барт-цхьоагӀо чӀоагӀдара. Дег чура лов сона гӀабартой-балкхарой къамаш ираз долаш хилар. Кхы во ма доагӀалда шун вахаре!» - йоах Келаматанаькъан Махьмуд-Ӏаьлас кхайкарал тӀа.

Балан денна хетаяь митинг дӀайихьар Нальчике, балкхарой къам мехкахдаккхара хетаяь, из хилар дагалоаттама мемориале. Цига дакъа лоацаш хилар мехка паччахьалкхен болхлой, Ӏаьдала органий кулгалхой, юкъара болх бераш, дин викалаш; культуран, Ӏилман, искусствай болхлой; дешархой, гӀабартой-балкхарой кагирхой, иштта республикан хьаьший.

Гулбеннарий таро хилар къам мехкахдаккхара дагалоаттама мемориала музее кердача гойтамга хьажа. Гойтам бийкъа бар шин даькъа: «Тхона нах хила низ мел тоъача хана, тхо укх лаьтта, къам долаш, дахаргда», «Даьхе лораяр яхаш болх ба вайна».

Хьалхарча аргӀагӀа балкхарой мехкахбахарах дийцар. ШоллагӀча даькъе - къаман сийдолча къонгех, массаза вай Даьхе лораеш лаьттарех, царна карагӀдаьннарех, тахан а Донбассе дӀахьош йолча лаьрххӀача операце дакъа лоацаш, моастагӀчоа духьалъэтта, денал, майрал гойтарех.