ГӀалгӀайчен Кулгалхочо къаршой къаманца екъ сагото
02.11.2023 16:57
1943 шера, лайчилла бетта 2-ча дийнахьа,80 шу хьалха вошал долча къарший къаман, Сталина ханашка лаьтта бала тӀабера, уж мехках боахаш: шоаш бахача цхьа саг ца вуташ, арабаьхар уж. Бала тӀабенача къаман дукха Ӏазап ла дийзар, дуккхабараш, из ла ца могаш, вахарах къаьстар, тӀакхаьча халонаш котъяьнна хиларах.
«Тхона дика йовз из чов, цу денца бувзабенна бала. Тахан шуца бала бекъаш да тхо, шо хьал а лоац, цу къизача шерашка шоай гаргарча нахах къаьста хинна дезал а хьаллоац оаха, дукхача халонех уж чакхбаьннилга а хов», - цу дешашца кхайкарал дир Къаршой къаманга ГӀалгӀай Республикан кулгалхочо Келаматанаькъан Махьмуд-Ӏаьлас.
«Итташ бехк-гунахьа боаца нах адама духьалъяьккхача къизалах байра; Сталина гӀозаро тийшача балхах мехках а баьха, шоаш мел леладаьчох баьнна, моцал, хьогал ловш эзача Ӏазапах; шоай дезалех къаьстар. Бакъда наха шоай культура, Ӏадаташ лорадир. Вайна дицлургдац хиннар, бакъда дикачунга сатувсаш даха деза вай. Со тешаш ва, Россе къаман машар, сатем, цхьоагӀо, дикагӀа бола дагалоаттам хургба цу къизача шерашка вайцара къаьстача наха. Дала цу моча хӀамах лорадолда вай; аьттув, машар болаш дахалда вай!» - йоах таханарча кхайкарал тӀа ГӀалгӀай Республикан Кулгалхочо.
Къаршой къам, Къилбаседа Кавказа къамашта юкъе, хьалхарчарех нийсделар цу Ӏазапа кIалха, уж чакхбаьлар, Сталина бӀехача гӀозарах. 70 эзар Къаршой къаман нах, низагӀа шоаш бахачара арабаьха, мехкахбахарах; царех 43 эзар сага вахар а хаьдар. Царна юкъе 22 эзар бер дар.
