КӀимарса бутт дӀаболалуш, РФ премьер-министра Мишустин Михаила лоархӀамеча каьхата кулг яздир, РФ юртбоахамаш дегӀадоаладара хьакъехьа — «2030 шерга кхаччалца органически продукци арахецара болх дегӀабоалабар».

Из юкъедоаладаро таро хулийтаргья, экологически цӀена юртбоахама продукци дукхагӀа хилийта.

Из езаш я дерригача дунен тӀа. ХӀанз латташ йолча хана, из арахецаш хилар юртбоахам дегӀабоалабара даькъ тӀа эггара дикагӀчарех лоархӀ.

ГӀалгӀайчен кулгалхочо Келаматанаькъан Махьмуд-Ӏаьлас яхачох, цӀена продукци лелае безам болчарна юкъе я ГӀалгӀаче.

«Вай цу хьакъехьа дика таронаш я: дика лаьтта, мехкала  дика хьалаш, къехьегама тӀера бола нах. Цул совгӀа, лаьтта дикагӀа хургдолаш дӀатоха удобрени а я вайга — «Южни» яха оалхазарий комплекс, цига москалаш кхею, цар кхача а арахец.

Цига удобренеш хургья. Оаха дийцад из проект кхоачашъяра органически удобренеш йий яха дош, цига дика таронаш хилар белгал а даьд».

Махьмуд-Ӏаьлас яхачох, минеральни, химически удобренеш ца тохаш, органически удобренешца кхеяь продукташ дуккха а пайданегӀа я сага.

Цул совгӀа, Ӏалама а зе дац цар.

Вай мехка хӀанз укх сахьате органически продовольстви, юртбоахама бийдал арахецаш 46 субъект я. Арахецараша цахаддаш лоаттаю уж эцархошта. Цу тайпара хӀара шера из продукци дегӀайоагӀаш латт, юкъера лаьхӀача 8-10 %.

ГӀулакх довзараша яхачох, кхы а дукха къахьега деза,  чурча рынке ший моттиг цо хьалоацаргйолаш, хӀана аьлча кхоачам болаш яц из таханарча денна.

Керттер дар да Россе чурча рынке лоаттаеш йола органически продукци совъяккхар, из кхыча паччахьалкхенашка дӀакхахьийтара таронаш йоаржаяр, пайда хьабоалаш йола агротехнологеш юкъеяхар.

Цу дерригне таро хулийтаргья Россе бахархоша лелаеча кхачан продукце дикал лакхъе, цул совгӀа совъяргья балха моттигаш а.