Цо белгалдир, беррига гIалгIай вIашкаозар вай зIамигача а йоккхача а Даьхенцара безам ба аьнна.
«Хьамсара мехкахой!
Аз дегчура даькъалдувц шо ГIалгIай Республика хьакхелла 29 шу дузаш хиларца!
Вай республика хиларах доккхалдайташ дола цIай да ер. Тахан вай дерригаш а вIашагIтохар да, зIамигача а боккхача а Даьхенцара безам.
Укх деношка сийца дагаух вайна вай къаман викалаш, гIалгIай паччахьалкхе хьакхоллаш цар хьийга къа, цар юкъедена дакъа мел лоархIаме да вай мохк дегIабоалабара.
Баркал оал вай мехкахошта республика цIи гаьнна дIахазийтарах, из хьакхоллаш цар доккха дакъа юкъедена хиларах, шоай зIамига Даьхе езаш хиларах, хIанз а из дегIайоалаеш къахьегаш уж хьабоагIаш хиларах. Вай доккхал ду царна карагIдаьнначох, масала эца уж вай тахан хиларах.
Вай республика эггара Iалама хозагIа йолча моттиге улл, дIаьхий да вай истори, Iадаташ.
Республика хозленах цец а бувлаш хIара шера ух вайцига туристаш. Цун керттера мах бар — хьаша-да тIаэца ховш хилар, гонахьарча къамашца барт хилар да, цудухьа регион меттел беррига Россе мохк а дегIабоалабара хьаькъе доккха дакъа дIалоац цо.
Республика социально-экономически хьал тоадара тIехьарча хана дукха хувцамаш хиннад. Дукха хIама деш латт медицина, образовани, физически культура, спорт, туризм дегIайоалаяра, балха моттигаш хилийтара. Из дерригаш а Российски Федераце кулгалхой оагIорахьара новкъостал лоаттадеш хилар а вай бахархой хьинар долаш хилара а бахьан да.
ХIанзачул тIехьагIа а дукха декхараш латт вайна хьалхашка, бакъда вай массане а из юкъара декхар долга а ховш дIахо барт болаш вай дIадолхе моллагIа йола халонаш тIехьа йита вIаштIехьдаргда, республика ди тIехьагIа дегIайоагIаш а хургъя.
ЦIаькхаза а аз дегчура даькъал дувц шо цIайца, Республика Денца! Со тешаш ва барт хиларца моллагIча халонашта вай духьалотталуш хургда аьнна. Могаш маьрша хилда шо, ираз аьттув ма эшалба шоана, хIаьта вай дикача мехка машар, хозле хийла!», — аьлар ГIалгIай Республика кулгалхочо.
