«МагӀалбик-Шахьара моастагӀа тӀа ца вайташ, биъ бетта дӀахьош хиннача тӀема юкъе 120 эзар советски салте веннав. Укхаза лаьтта тӀом хьамсара лаьтта бахьан долаш хинна Ӏацар, из бар моастагӀа эшавара керттера тӀом. Немций Шолжа-ГӀаланна, бакински мехкдаьттанна тӀакхача гӀерташ хиннав, ший тӀема техника доагорца Ӏалашъе гӀерташ. Бакъда цунна маганзар лаьрхӀа хиннар кхоачашде», - аьлар мехка Кулгалхочо, МагӀалбик турпалхоша лораярах лаьца дувцаш.

Келаматанаькъан Махьмуд-Ӏаьлас хьалхадаьккхар, шахьар лораеш бӀухой-интернационалисташ хинна хилар. Масала, МагӀалбик лораеча дакъа лоацаш бар Советски Союза тайп-тайпарча моттигашкара бӀухой: эрмалой, гуржий, гӀуозлой, эрсий, гӀалгӀай. Республикан Кулгалхочо белгалдаьча беса, тохкам беш йолча тоабашта хӀанз а турпалхой тӀехкаш корайоагӀа, уж дезалашка дӀакхоачийт.

«Тӏема сийлен гӀала» яха Сийдола цӀи МагӀалбика елар 2007 шера.

Ардара бетта 8-ча дийнахьа,17-шу хьалха, из яларах дола Россе Президента амар арадаьлар.