ИЗО музейс арахийцад истори, искусство езарашта лаьрхӀа календарь
ГӀалгӀай Республикан исбахьален искусствай паччахьалкхен музейс кийчдаьд, гӀалгӀай къаман истори, искусство езарашта лаьрхӀа ший тайпара совгӀат - начӀал долча суртанчас Ильясанаькъан Индирай балхаш тӀадола ханорг. Из хетадаь да гӀалгӀай паччахьалкхен 100 шу дизара. Цу ханорго моллагӀа моттиг а хозъергья, бӀарг а гӀадбугаргба, гӀалгӀай лоархӀаме истори дагадохийташ.
«Тха музейс арахийца ханорг боккъонца дола искусствон жовхьар да. ХӀара бетта оагӀон тӀа го йиш я, гӀалгӀай къаман къаьнарча ханашка цу беттаца дувзаденна могадеш а нийслуш а хиннараш. Цу оагӀонаш тӀа гӀалгӀай къаман тӀабувхабу гӀирс, вахаре лелаяь хӀамаш, кхы а дуккхадараш го йиш я. Цо таро хулийт дӀаяхача ханарча вахарга кхача, вай даьшцара бувзам сомабаккха», - аьлар «Сердало» газетага ГӀалгӀайчен исбахьален искусствай Паччахьалкхен музея кулгалхочо ТӀумхой Любас.
ГӀалгӀай къаман белгалонаш, таханарча заман искусства оагӀув, иштта кхы а дукха чулоацам болаш да Ильясанаькъан Индирай сурташ. ХӀара оагӀон тӀа искусствон тамашийна куц го йиш я, из хьакхеллад суртанчас, ший къаманцара боккха безам гойташ, хьалхарча вахара оагӀув юкъейоаккхаш, вай къаман Ӏадаташ, хозал йовзийташ.
НачӀал долча суртанчас кхеллача сурташка хьежача, го йиш я дӀаяхача ханашка хиннача вахарцара цун бочал. Цу ханоргах наха доккха совгӀат хургда, ший къаман культура, истори дезаш волчо лакхара мах оттабергба цун хозала, цул совгӀа, хӀара денна цхьацца кердадараш довзаргда наха.
Ханоргаш башха дукха арахийцадац, бакъда ший вахара кӀеззига хозал юкъея безам болчоа, из кхы а дезагӀа хургда, бӀарчча шера цу тӀара гӀалгӀай культуран жовхьараш довза йиш хиларах.
