Из гӀишло вай геттара чӀоагӀа, ший тайпара хьалъе еза. Цунга дӀайодаш йола материалаш хоржаш эца еза, хӀана аьлча акустика, оаз тӀехьагӀа во хила тарлу, цу моча гӀишлонна из чӀоагӀа лоархӀаме да. Аз лаьрхӀад тайп-тайпара говзанчаш, технологаш беха, тӀахьожам лоаттабергболаш, хӀана аьлча гӀишло ший тайпара я, дукха да цу юкъе теркалде дезараш. Цхьацца дола хаттараш дийцад «Сафмар» яхача дикача гӀулакхий ганзаца», - аьлар Келаматанаькъан Махьмуд-Ӏаьлас, къамааьла юкъе дакъа лаьцарашка. Цхьаькха лоархӀаме дош дар цига дувца оттадаь, лаьтташ бокъо йоацаш дӀалувцаш хилар. Лаьтта хьадалар бокъонах доагӀача беса хила деза, цу гӀулакхах бехктокхаме болча болхлоша терко лоаттае еза цу деша. Бокъо йоацаш, лаьтташ дӀалийцача наха ха деза, Ӏаьдало республикан хьашт юридически оагӀорахьа кхоачашдергдолга, уж Ӏаьдала доалахьа дерзадергдолга», - аьлар республикан Кулгалхочо, цунца цхьана моттигерча паччахьалкхен председатела заместитела Фаттахов Тимура хьалхашка тӀахьожам лоаттабара декхар а оттадеш, Магасе бокъо йоацаш хьалъяь гӀишлош хургйоацаш. ДӀахо кхетаче дувца оттадаь дош дар электрически подстанцеш тоъаш цахилар, иштта хий цӀендеча гӀишлой болх тоабе а шербе а безаш хилар. Бухсоццаш, Келаматанаькъан Махьмуд-Ӏаьлас белгалдир ГӀалгӀай паччахьалкхен 100 шу дизара ха а тӀакхоачаш хилар, цунца дувзаденна ГӀалгӀайчен столица дикка хувцаяла езаш хилар белгалдаьккхар.