ГӀалгӀай мехка шахьараш хьалъяра гӀулакх дикка эргадаргда
Гонахьарча моттигашца бувзабенна къаман оагӀонцара федеральни программах бола болх чакхбаьлар Магасе. Цу гӀулакхо тоадергда лаьттан доазошцара, шахьараш хьалъярцара гӀулакх боаггӀача боараме.
Магасера деррига 22 доазон дакъа ЦаӀ йолча паччахьалкхен реестра юкъедихьад, доазош къоастадаьд, дӀачӀоагӀдеш болх дӀабихьаб. Программан юкъе эггара лоархӀамегӀа дар хӀара куранна доагӀаш дола кадастрови балхаш дар. Укх шера чакхбаьккхаб кхаь кхаленцара болх, кхыча моттигашцара болх дӀадахача шера йистебаьккхабар. Цо хьагойт, 2025-ча шера Магасе кадастрови балхаш дӀадахьа ца дезилга. Бакъда болх цу тӀа соцаш бац.
Вай мехкадас Келаматнаькъан Махьмуд-Ӏаьлас тӀадилла, лаьттан доазоний хьал тохкаш болх дӀабихьар Магасерча мэре болхлоша, гучадаьлар, бокъо йоацача тайпара дӀалаьца 62 моттиг йолга. Мехкадас белгалду, цу оагӀонцара болх боаггӀача боараме дӀабахьар шахьара бахархой хьал тоадара тӀехьа, инвестицей оагӀонца лоархӀаме долга.
«Программага гӀолла дӀахьоча балхо кадастрови оагӀонца дувзаденнараш тоадергда, лаьтташта тӀагӀолла латта къовсамаш дӀадоахаргда, шахьарера цу оагӀонцара гӀулакхаш хила деззача тайпара дӀадохьийтаргда. Магаса хьал таханарча хано дӀадеххача тайпара тоадара тӀехьа, из болх боаггӀача боараме чакхбоаккхаргба оаха», - белгалдир мехка кулгалхочо.
