Матч дIайихьар, Назранерча Овшанаькъан Рашида цIерагIча, «Центральни» стадионе. Йистеяьлар чот 3:0 йолаш.
Чот хьайийлар вар «Ангушта» доакъашхо Балайнаькъан Мухьмад. Цо хьалхара бургац чуяьккхар вай хьаьший наIарашка, цул тIехьагIа кхы а шозза баьлар вай команда, цу тайпара аьттув.
Хьалхара ловзара дакъа йистедалалца чот 1:0 йолаш дIахьош дар.
КIеззига салаьIачул тIехьагIа, 55 минот йодаш, «Дербент» командо нийса никъ лахарца, чот хьанийсйир. Цул тIехьагIа фусамдаьша шоай низ ураоттабир. Мархенаькъан Iийсай кулгалца Iомабаьча футболисташа шозза бургац чуяьккхар, шоай командагахьа совле а йолаш.
ТIеххьарча итт минота «Ангушто» шозза бургац чуяьккхар, цу тIехьа назрановций котало дIачIоагI а еш. Цига белгалбаьлар Пхьарчанаькъан Ахьмад, Iаьленаькъан Бекхан.
«Ангушт» юха а чемпионата таблица тIа хьалха латташ я: 12 матчах цо яьккхай 28 очко, цу тайпара, ловзархой хьалха а боалаш. - «Уж иштта, хьалхарчарца хургбий ховш хургда прохладнерча «Энергетикаца», астрахански «Волгарь-Ю» командашца лайзачул тIехьагIа», - аьнна яздаьд «Ингфутбол. ру» портала.
«Дербент» 14 баллаца, таблица ялхлагIча моттиге я. АргIанарча матче, «Ангушт» аьтинга бетта 25-ча дийнахьа, арахьа дIаяха ловзаргья астрахански «Волгарь -М» командаца.
