Келаматанаькъан Махьмуд-Ӏаьлас Гӏалгӏайчен ишкол яьккхараш даькъалабийцар, тӏеххьара гургал тохарца
Гӏалгӏайчен массайолча ишколашка тахан лаьрххӏа йола кхетаченаш дӏайихьар, тӏеххьара гургал тохаш хилара хетаяь. Цу лоархӏамеча дийнахьа ковнаш хьалдизар зизашца, берий деларца, цунца цхьана шоаш къасташ хиларах гӏайгӏане бахарца. Ишкола яьккхараш даькъалабийцар Гӏалгӏайчен кулгалхочо Келаматанаькъан Махьмуд-Ӏаьлас. Республикан Кулгалхочо белгалдир, из ди эггара бехктокхамегӏа хилар, хӏара къонача сага вахаре.
«Тӏехьа дисар дешара шераш, урокаш, переменаш, новкъостий, хьалхара бехктокхам, лоархӏаме коталонаш. Хьалхашкахьа да - воккха хиннача сага вахар, цига шух хӏаравар ший никъ лаха безаш ва. Лоархӏаме да из нийсхо йолаш, сий долаш, нахацара безам болаш, да-нана лоархӏаш дӏабахьар. Ма кхера халонех, шоаех тешаш хила, деша, шоаш мичахьара хьадаьннад диц ма де. Миччахьа шоаш хиларах, массаза наха пайда бахьаш хила», - аьлар Келаматанаькъан Махьмуд-Ӏаьлас ишкол яьккха баьннарашка.
Цо дег тӏара ловца баьккхар цар хьехархошта, хьехамчашта, цар дукхача шерашка дика ноахал хьалкхедеш къахьегарах, уж даим царца болаш, уж хьаллоацаш хьабоагӏаш хиларах. Республикан кулгалхочо ше тешаш ва аьлар, лакха говзал йола говзанчаш хургхиларах таханара ишкол яьккхарех: лораш, инженераш, ӏилманхой, хьехархой - цар лоархӏаме дакъа юкъедахьаргда хьамсара мохк дегӏабоалабеча.
