Ӏарафат Денца мехкахой даькъалабийцар вай Мехкадас Келаматанаькъан Махьмуд-Ӏаьлас
Бӏарчча шера деношта юкъе Дала деза, беркате, лоархӏаме даь къоастадаьча ӏарафат Денца мехкахой даькъалабийцар вай Мехкадас. Республикан кулгалхочо белгалдир, бусалба наха чӏоагӏа хьамсара цӏай из долга, Дала вайх боккха къахетам баь, хам баь варгвоаца дикаш юкъелаьца даьча дуӏан жоп луш, дайта Ди из долга. Ӏарафат дийнахьа даь дикаш къаьстта доккха да.
«Наха гӏурба де жа декъаш болча Даьла духьа юкъебаьккхача болама тахан диълагӏа ди да. 7 эзар совгӏа болча дезалашта гӏурба де гӏо даьд. Дунен тӏа эггара езагӏа йолча моттигашка – Мекке, Мадинате баха хьажол деш болча вай мехкахой беркате хургдолча дуӏашта жоп лулда Дала, Цун къахетамах, беркатах, гӏозаленах дизза хилда вайна ер денош.
Бусалба наха сагӏаш ду, маьл хургбола, Даьла раьза хургвола гӏулакхаш доаржаду, геттара дукха дуӏаш ду денош да ераш. Аллахӏа къоабалдаь даэцалда вай ӏибадат доаржадеш дола дикаш. Дала ший боккхача къахетамах, беркатах ма доахалда вай! Амин!» - йоах вай Мехкадас тахан бахархошка къамаьл деш.
Зуль-хьиджа бетта юкъе къаьстта деза долаш къоастадаьд 9-гӏа ди, тахан хьажол тӏерадоаккхаш барашта а эггара лоархӏаме дола ди да из. Укх доккхача дунен тайп-тайпарча моттигашкара тӏагулбенна бола бусалба нах тахан ӏарафате шоаш Кхеллачунга кхайкаш, хьесталуш, дуӏаш деш, къахетам бар, къиношта гештдар дехаш латт.
Вайна массанена ма харра, ӏарафате латтар хьажол тӏерадаккхара бухь, эггара лоархӏаме дола гӏулакх да. Дерригача дунен тӏара бусалба нах тахан ма хулла дикаш де хьожаш, Къорӏа дешаш, марха кхоабаш ба. Ӏарафата дийнахьа марха кхабар дӏадахача, тӏехьа тӏадоагӏача шера къиношта гешт деш да, аьнна, белгалдаьд.
Тахан дӏа-хьа хьежача вай теркалду бусалба адам чӏоагӏа дог айденна, дегашка дикахетар десса, къахетам бар дехаш, Даьлага хьесталуш долга. Дала къахетам баьрех хилда вай дерригаш!
