Республикерча ДРКБ инфекционни даькъа тока хьал меттадоаладир
Республикерча берий клинически дарбанчен керда инфекционни моттиг тока оагӏон гӏирсех дӏахеттар «Къилбаседа Кавказ Россетий» - «Ингушэнерго» филиала болхлоша. 660 киловатт ток я цу моттига къоастаяьр.
«Унахцӏено» яхача къаман проектага гӏолла хьалъяь дарбанче 60 сага моттигаш луш я.
Белгалде деза, цига цхьан унахочун лаьрхӏа а фусамаш йолга. Инфекционни моттиге из чӏоагӏа лоархӏаме да. Лаборатори, нах эттӏабу моттиг, реанимаци, иштта кхыдола мел эшараш да кердача дарбанче.
Къаьнарча дарбанче дукха кхоачамбоацараш дар, боаггӏача боараме унахошта дарба лоаттаде аьттув бацар, цунга хьежжа, вайна массанена доккха совгӏат хулаш да иштта керда, мел эшар чудола моттиг хьаеллар.
Белгалде деза, «Россеташ» компане оагӏонца Портал-ТП.РФ яхача сайта кабинете гӏолла, токах дӏахотта езача моттигацара дехар чудала йиш йолга.
