ГӏалгӀайченна Хьажол де 1 400 моттиг елар
Карарча шера ГӏалгӀайченна Хьажол де елар 1 400 моттиг. Цох дийцар 2026 шера Хьажол дара болх вӀашагӀболлаш йолча Кхела гулламе. Кхетаче дӀайихьар РФ сенатора, Хьажола гӀулакхех викал волча Умаханов Ильясбека кулгал деш.
Хьажол де болхарий кийчо сиха ергья таьрахьий кепара. Оператора «Ингхадж» ший балха тӀехьа лоархӀаме дӀадехараш да, ахчанцара хьал къаьгга хургдолаш, хьажол де болхарашка хоам бар, еррига бокъонаш кхоачашъяр. Керттера терко тӏайохийтаргья доакъашхой лорашка чакхбахара, царна маьхий тохара.
ГӏалгӀай Республикан Кулгалхочун, Паччахьалкхен зарбан болх лелабераша белгалдир, каьхат кийчде дезилга хьалххе а. Нагахьа санна енна моттигаш оагӀой бетта 21-ча денга кхоачаш дӀаийца ца хуле, юхейиса моттигаш кхыча мехкашта дӀалургья. Цул совгӀа, СВО доакъашхой дезал карарча шера юха а баха йиш йолаш ба чухьнахьарча маьхах.
«Тха декхар - хьажол де болхарашта ма хулла дикагӀа хьалаш хьакхоллар. Дуккхабараш, шерашка кийчо еш хул цига бахара, вай воашта могар де деза уж, ца кхераш, паргӀата хилийтара», - аьлар ГӏалгӀайчен Кулгалхочо Келаматанаькъан Махьмуд-Ӏаьлас.
Белгалду, ГӏалгӀайчера хьажол де нах бахийта лаьрхӀад, 2026 шера бекарга бетта 19 денгара маьтсела бетта 1-ча денга кхаччалца. Деррига каьхаташ кийча хила деза, тушола бетта 20-ча денга кхачалехь.
