ГӀалгӀайченна 60 млн сом лургда, берий ахкан салаӀар тоаде
ХьатӀадоагӀача шера, республикан 60 млн сом ахча лургда берашта лаьрхӀа йола салоӀа моттигаш дикагӀа дегӀайоалае. Из ахча грантах луш да, РФ дешара Министерствос дӀахьош хиннача яхье толамаш дахарах.
Республикан Кулгалхочун зарбан болх лелабераша яхачох, хьалде лерхӀаш да 900 кв метр йола шиъ модульни цӀа, уж да 98 сага лаьрхӀа, хьалдергда «Мехкадаьттахо» яхача берий лагере. Цига керттера теркам тӀабохийтаргба берашта дика хьалаш хилийтара, уж хьалде лерхӀ цаӀ йолча дизайнах.
Цул совгӀа, цига хьаелла лерхӀаш я «Авангард» яха дешара - методически центр, бӀарчча шера дӀахьош хургья цу моттиге тӀема-дешара кхетаченаш.
«Цу тайпара берашта салаӀа а деша а таро йола моттиг хьаеллар вай керттера декхар да, лоархӀамеча декхарех лархӀа дезаш а да. Сона хетачох, модульни отелаш хьалъяро берашта дика салаӀа таро лургья. Иштта атта вӀашагӀдолла йиш йолаш из хиларах, бераш а цига дукха хургда салоӀаш», - аьлар ГӀалгӀайчен Кулгалхочо, цу темах лаьца дувцаш.
