ЖКХ оагӀонца дувзаденнараш тоаде, 80 млн сом ахча хьожадергда мехка
ЖКХ оагӀонца дувзаденнараш тоадара тӀехьа Россе Паччахьалкхено рузкъа хьожадергда вай мехка. ЖКХ, тока моттигаш меттайоалае аьнна, укх шера вай мехка пилотни проектага гӀолла хьахьожадергдар 79, 7 млн сом ахча да.
Мехкадаь, Паччахьалкхен зарбан болх лелабераша белгалдечох, цу программан юкъе дакъа лацар вайна дикка аьттув луш хилар: хатараш лаьгӀденнад, 16 км кхоачаш йола тишъенна хин турбаш хийцай, цул совгӀа, боккха болх дӀахьош юстардаьккхар 2 800 хатар. Хьадайтача ахчанга гӀолла дӀахохьоргба из болх. Керда хин моттигаш чуйоахкаш, таханара технологеш йоаржаеш, къахьегаргда дӀахо а цу оагӀонца.
2027-ча шерга кхаччалца дӀахьоргболаш, боккха болх ба из. Вай Мехкадас Келаматанаькъан Махьмуд-Ӏаьлас доккха баркал аьлар Россе Паччахьалкхенна, иштта оагӀув хьаллацарах.
«Берригача бахархошта ЖКХ оагӀонца дувзаденнараш боаггӀача боараме тоаде гӀерташ къахьег оаха тахан цхьана. Иштта цхьана дӀахьоча балхо цу оагӀонца дувзаденнараш дикка меттадоаладергда, аьнна, хет мехкарча берригача бахархошта», - белгалдир Мехкадас.
