Гӏалгӏайчено дика толамаш доах, къаман проекташ кхоачашъеча
Гӏалгӏайчен Паччахьалкхен кхетачен доакъашхоша, хьалхарча вице-премьера Йовлой Мухьмада кулгал а деш, дийцар къаман проекташ кхоачашъеш хиларах. Проекташ еча офисо яхачох, къаман ялх проектах бола бартчӏоагӏам баьб 4,127 млрд сома, из да 98,15% лаьрхӏа хинначох.
Кассе гӏолла из кхоачашдарга диллача, из хул 2,962 млрд сом-70,45% юкъарча плана тӏара. Къаьстта белгала йоалаш я «Экологи», иштта «Пайда луш йола яхьеяьнна экономика» яха оагӏонаш, цига дӏадахар да 100%. «Кагирхой, бераш» яхача проекта дика толамаш гойт-78,7% (Россе гӏолла-72,9%). Мехка дика кхоачашъеш я «Дӏаьха а дика а вахар» яха оагӏув (63,5%, мехка гӏолла йола процент хьаийцача из яц 62,5% мара), иштта «Вахара таронаш» (71,4%, из я 67% духьала). Тӏехьаюсаш яц туризма оагӏув а. Из я 79,2%, мехка гӏолла юкъера дӏалаьрхӏача 33,1%.
Кхетаче дӏахьош вице-премьера белагалдир, шоай ханнахьа царга дӏадодар дӏа а дохийташ, уж кхоачашъеш хиларо наьха вахара хьалаш тоадергхилар.
Республикан Кулгалхочо Келаматанаькъан Махьмуд-ӏаьлас иштта белагалдир къаман проекташ лоархӏаме хилар:
«Вай дика хьалъеш латт ишколаш, тоаеш латт берий бешамаш, наькъаш, унахцӏенон гӏишлош, юкъарлон доазонаш, иштта хьаллоац культуран проекташ. Болх дӏахьош ба массайолча оагӏорахьара, вайна гуш ба толам».
