Наьха ханаш йӀаьха хиларах хьалха латташ я ГӀалгӀайче
ГӀалгӀайче хьалхарча моттиге я саг дукха вахаш хилара даькъ тӀа, Россе моттигашта юкъе, тӀехьаюташ шахьараш Москва, Санкт-Петербург, иштта лоалахара Дагестан, ГӀабартой-Балкхарой. Росстата хоамаш хьагойтачо, хила тарлуш дола сага дӀаьха вахар 78,34 шу да.
Уж хьокхамаш иштта нийслу дукхача бахьанех. ДукхагӀча даькъе 37% моттигера хьинарерча вахара никъ лелабеш хиларах, мехка гӀолла латтача юкъерча хьалал лакхагӀа да из.
ГӀалгӀайчен Кулгалхочо Келаматанаькъан Махьмуд-Ӏаьлас белгалдир, цу тайпара толамаш - из иштта унахцӀенон даькъ тӀа хьегаш дола къа да, аьнна. Республике хьалъеш я керда унахцӀенон хьалхарча даькъера дарбанчен гӀишлош, хьаеллаш я лаьрххӀа йола отделенеш, каст-каста дӀахьу нах лорашка чакхбахара болх. Лорий хьалаш лакхлуш доагӀа, юкъейоалаш латт таханрча заман технологеш. Цул совгӀа регионе кхоачашъеш я социальни программаш, къоаной хьаллацара.
«Вай республике нах йӀаьха ха йолаш хилийтара- из паччахьалкхено хьегаш дола къа хинна Ӏец, из лорий а къахьегам ба. ГӀалгӀай къаман массаза хиннад къоано лоархӀаш цун лакха мах оттабеш, уж нах ший къаьстта лерхӀам болаш хиннаб, цар йокхо а еш»,-аьлар Калиматовс.
