ГӀалгӀайчера Газе гумманитарни новкъостал дахьийтар
Укх деношка, ГӀалгӀайчера Палестине 28 тонн гуманитарни новкъостал дахьийтар, мехка Кулгалхочо тӀадиллача декхарах. Из вӀаштӀехьадаьлар республикан Паччахьалкхено, юкъарча тоабаша, хьинар долча Даьла духьа гӀо деш лелача наха цхьана къахьегарах.
Новкъостал деш, гулдир ца талхаш дукха ха йоаккхаш дола кхачан даараш, хьоар а иштта наха хьалхарча аргӀагӀа эшаш бола гӀирс а. Къаьстта теркам тӀабахийтар могашал яйнача наха эшачунна: заӀапхой вордингаш а яр цу юкъе, лорий гӀирсаш а дар.
«Вай тахан хьаллаца беза новкъостал эшаш бола нах, воашта могар де деза.
Дег чура баркал оал аз цу гумманитарни новкъостала юкъе дакъа лаьцарашта, из дӀадохьийташ къахьийгарашта», - аьлар Келаматанаькъан Махьмуд-Ӏаьлас, яхаш, дийцар тхона цун зарбан болх лелабераша.
