Вай республике кхаьчар 15 керда дешара автобус
ГӏалгӀайче дӀахохьош ба, дешархой дӀа-хьа кхувлара йола автопарк кердаяккхара болх. Федеральни проекта чудоагӀаш, Россе дешара Министерствос вай мехка 15 керда дешара авобус елар, яхаш, дийцар ГӏалгӀай Республикан Кулгалхочун, Паччахьалкхен зарбан болх лелабераша.
Республике ера «НАЗ-А66R33» кепара бархӀ автобус, иштта «ПАЗ-32053-70» кепара ворхӀ автобус. Ерригаш керда а, бераш лозадергдоацаш тӀехкараш доахкаш а, кхыдола гӀирсаш чудолаш а я. Цо таро лу берий кхерамзлен ӏалашо е уж дӀа-юха дугача юкъа.
Зарбан болх лелабераша белгалдир, уж бераш деша, олимпиадашка, культуран кхетаченашка кхувлаш лелаергья. Ардара бутт чакхбалале уж дӀаекъаргья Наьсарен, Шолжен, Магаса, Илдарха-Гӏалан, иштта Эбарга-Юрта, Йоккхача Ачалкхен, Деби-Юрта, Жӏайрахьен ишколашка.
«Оаха кхетаду мел чӀоагӀа эшаш я транспорт дешара даькъ тӀа. Къаьстта из кхетаду йоккха йоацача, гаьна ядача юрташка, цхьайолча гӀаш бераш ишколе дахара халонаш нийслуш йолча моттигашка. Цудухьа оаха кӀезиг-кӀезига кхоачашду цу тайпара дешаш, хӀанз 200 совгӀа я из транспорт», - аьлар Келаматанаькъан Махьмуд-Ӏаьлас.
Цо иштта баркал аьлар Россе дешара Министерствонна, цо новкъостал дарах.
