Гӏалгӏайчен экономикан керттерча доакъошта юкъейоах инвестицеш
Гӏалгӏайче тахан кхоачашъеш я инвестицей 17 проект 26 млрд сома, яхаш, дийцар «Сердало» газетага ГӏР Кулгалхочун зарбан болх лелабераша.
«Тхона лоархӏаме да, инвестицей чӏоагӏо предприятешка хьадеча хӏаманца гуш хилар, цунца цхьана керда балха моттигаш хьаеллар. Дӏадахача шера тха таро хилар 14,5 млрд сом совгӏа бюджетера доаца ахча юкъедаккха. Цо хьагойт республикан таронаш бизнесаца гуш хилар, из лелаераш болх бе кийча хилар. Тхона из лакха мах ба», - аьлар Келаматанаькъан Махьмуд-ӏаьлас, ше цох дувцаш.
Из болх дукхача оагӏорахьа дӏахьош ба, цунца таро я лаьрхӏа мехка экономика дегӏайоалае. Цун чуйоагӏаш я промышленность, юртбоахам, туризм.
2025 шера Гӏалгӏайче чакхъяьлар йоккха цхьа проект 7,7 млрд сом совгӏа инвестицеш йолаш. Карарча хана хьожаш ба кхы а йиъ проектага, 10,7 млрд сом мах болча. Цу юкъе логистически центр «Wӏldberrӏes», «Цӏай-Лоам, Мужеча хьалъеш йола этнокультуран комплекс, республикан столице Магас-Шахьаре фусамашта лаьрхӏа комплекс я.
Гӏалгӏайче «цхьа кор» яха инвесторашта дола хьалаш хьакхоллаш да, цо таро лу проекташта тӏехьахьажа, лаьттанцара дӏадоладенна проект хьаяь яллалца йолча хана дӏахьош дола балхаш зе.
Гӏалгӏай Республикан промышленни таро дегӏайоалаяра оагӏув я, Къилбаседа Кавказа хьалхара кӏалах гӏирсаш деш йола технопарк хьакхоллар. Из таро вай хилар федеральни центро «Пайда бола яхьий экономика» яха къаман проект хьаллацарах. Инвестицей мах 893 млн сом ба. Уж я массехк предприяти, дукха балха моттигаш, из лоархӏаме да вай мехка.
«Из гаьнайоалаш йола проект я, цо таро лу кӏала кийчде, цох лакха мах бола продукци арахеца. Технопарк лоархӏаме я республикан экономика дегӏайоалаяра», - аьлар Келаматанаькъан Махьмуд-ӏаьлас.
