Гӏалгӏай мохк дӏахо а толамаш доахаш ба таьрахьий даькъ тӏа
Гӏалгӏайче кхоачашдаьд таьрахьий нийсхон хаттар – дӏадахача шера Гӏалгӏайчен юрташка чоагӏбир мобильни бувзама болх, яхаш, дийцар «Сердало» газетага мехка кулгалхочун зарбан болх лелабераша.
«Тхона лоархӏаме дар, хӏара юрта мобильни бувзам, таьрахьий хьалаш хилар, уж юрташ гаьна хиларга хьежжа доацаш. Тахан бувзам – из духхьал къамаьл хинна ӏац, из ба дешарга, лорашка, банкашка, сихача гӏон моттигашка дӏакхачар», - аьлар Келаматанаькъан Махьмуд-ӏаьлас.
Из хаттар лоаман лакхача моттигашка ядача юрташка Хьуле, Бейне кхоачашдара, хьалхагӏа вӏалла бувзам боацаш хиннача моттигашка станцеш хьалйир. Хӏанз цу юрташка бахача наьха дикал а, Интернет а йолаш мобильни бувзам лелабе таро я. Цо ӏалашо ергья таханарча заман вахаре эшачунга кхачара: паччахьалкхен хьалашка, дешарга, лорий новкъосталага, кхыйолча электронни таронашка.
Республике дӏахо а цу тайпара болх дӏахьоргба, эшарашца ӏалашъяь станцеш хьаеш, чӏоагӏъеш, керда цӏенош хьалдаь моттигаш чулоацаш, массанахьа из хьал тоадеш.
Цул совгӏа, ӏаьдала органий балха даькъ тӏа «таьрахьашца дегӏадар» 11% дукхагӏа хилар, лаьрхӏа хинначул. Дика кхоачашду вай таьрахьашка далара хаттараш, лораеш йола сервисаш юкъейоалаеш, иштта региона ИТ-даькъ тӏара болх тоабеш. Дӏадахача шера говзанчаша юхатехар республикан таронашта тӏакхувш хинна кибератакаш, цу юкъе, хоамий кхерамзлен болхлоша лакхъеш шоай балха говзал.
