Нах бебарга диллача, хьалхара моттиг я ГӀалгӀайченга
Республико хьагойт нах тӀакхеташ латташ хилар, из Россе мехкашта юкъе хьалхарча моттиге я. Таханарча денга кхоачаш ГӀалгӀайчен бахархой 527, 2 эзар саг ва, царна юкъе 262,7 эзар маӀа нах, 264,5 эзар кхалнах ба. Царца да 161,8 эзар бер.
ГӀалгӀай республикан Кулгалхочун, Паччахьалкхен зарбан болх лелабераша яхачох, Ингушетиястата йоах, 2024 шу чакхдоалаш, республикан бахархой 533,8 эзар хила безаш ба.
Цул совгӀа, республике нах тӀакхеташ хилара хьал дегӀадоагӀаш да. Масала, 54,8% бахархой, е 290,1 эзар саг шахьарашка вах; хӀаьта 45,2%, е 237,1 эзар саг юрташка вах.
«Нах тӀакхеташ хилара бахьан да «УнахцӀено», «ДегӀаахар» яха къаман проекташ кхоачашъеш хилар, вай бахархошта цу даькъ тӀа даим новкъостал лоаттаду паччахьалкхено тайп-тайпара хьалаш царна хьакхоллаш, бераш дола дезал хьаллоацаш, вахаре лоархӀаме гӀишлош хьалъеш, вахара дика хьалаш хьакхоллаш», - аьлар ГӀалгӀайчен кулгалхочо Келаматанаькъан Махьмуд-Ӏаьлас.
