Гӏалгӏайче хьалха я, хьайбай таьрахь дӏаяздеча даькъе
Гӏалгӏайче дикагӏа йолча моттигех я хьайбаш дӏаяздарах, царна фост дарах. Из мах хоадабир «Ветеринари таьрахьашца: бакъда из е дац?» яха герга истол дӏахьош «Дошо гуйре-2025» гойтама чудоагӏаш.
Къилбаседа-Кавказстата беча хоамах республике 2025 шу дӏадолалуш 76,3 эзар бежан дар. 2025 шу юкъекхоачаш уж 72,2 эзар хилар. Цул совгӏа, дӏадахача ах шера шура яьккхар 74,5 эзар тонн; 11,1% дукхагӏа я из дӏадахача шера укх хана хинначул. Дулха продукци арахецара хьал а дика латт, из хилар 8,2 эзар тонн.
«Ший аргӏагӏа лостам бу юртбоахама даькъ тӏа хьайбаш дӏаяздеш. Дика дӏаяздеш хиларо хьагойт, хьайбаш леладара балха хьал гучахьа а тешаме а хилар.
Цо таро лу цу даькъ тӏара хьал дикагӏа дегӏадоаладе, дикал лакхъе, продукце кхерамзле лоаттае», - аьлар Келаматанаькъан Махьмуд-ӏаьлас.
Белгалду, «ВетИС» яхача даькъа «Хорриот» оала федеральни паччахьалкхен хоамий гӏирс дика лелабу цхьайолча мехка моттигашка: Краснодарски крае, Гӏалгӏай Республике, Селий мехка, Сахалински а Свердловски а областашка.
