Туристий даькъ тӀа, дукхагӀа бовзаш боагӀа вай мохк
Ший тамашийна хозача Ӏаламца, мах болча истореца, ГӀалгӀайчен цӀи дӀахозаш латт туристий даькъ тӀарча дукхача наха юкъе. Гостиницаш хьалйизай 85%, хӀаьта 2023 шера республике вена хилар 115 эзар турист.
Келаматанаькъан Махьмуд-Ӏаьлас яхачох, карарча шера вайцига баьхка хьаьший дукхагӀа ба - 125 эзар саг. ГӀалгӀайчен цӀихазара бахьанаш да, тамашийна хоза Ӏалам, истори хилар, иштта «Ӏарамхи» ВТРК яхар санна йола проекташ кхоачашъеш хилар.
ГӀалгӀайчен лакха лоамаш долча моттигашка го йиш я къаьнара гӀалаш, хӀаранена хьалха яйнайоаца хозал я из.
Вай республике деррига а да, Кавказа жовхьар из хилара тешал деш: лоамий лакхаленаш, ширача заман гӀалаш, цӀена фо. «Ӏарамхи» ВТРК боккъонца йола туристически центр хургья, цига тӀахьехаргба лоамашка соалозаш хехкараш, цу спорте дакъа лаца ловраш», - аьлар ГӀалгӀайчен Кулгалхочо.
«Туризм, хьаьший тӀаэцара таронаш» яха къаман проект хилар бахьан долаш, дика дегӀайоагӀаш я туризм, цо таро лу керда балха моттигаш хьакхолла.
