ГӀалгӀайче юха а хьалхарча моттиге я, «Россе Хий» яхача яхье
ДӀадахача шера ГӀалгӀайче хьалхарча мугӀаре яр, «Россе хий» яхача яхье, моттигашта юкъе йиълагӀа хулаш, шозлагӀа а хьалхара моттиг яьккхар «Эггара сихагӀа йола даь гӀулакх» яхача даькъ тӀа. Республике эггара сихагӀа долча экологически гӀулакха доакъашхой хилар ГӀалгӀайчен 20 эзар саг, хин йистош цӀенъяра, хин таронаш лораяра, аьнна, вӀашагӀбеллача балха.
«Тамаш елга дац, из аргӀанара совгӀат вай республиканна кхаьча хиларах. Вай бахархой массаза хиннаб, цу юкъе дакъа лацара кийча болаш. Цига къахьега арабувларашта юкъе го йиш я кагирхой санна, ха яхараш а. Цу тайпара вай хиларо таро лу, хиш а хин йистош а цӀена лелае. ДӀаяхача ханашка а вай Ӏадатех долаш хьаденад белхий бар. Цу къахьегамо нах шоайла вӀашагӀтох, шоайла кхоачарагӀа хулийт. Дег чура баркал оал аз «Россе хий» яхача яхье дакъа мел лаьцарашта, из совгӀат царна доагӀаш да», - аьлар мехка кулгалхочо Келаматанаькъан Махьмуд-Ӏаьлас.
Шоаш доаккхал деш хилар къайлахьош бац, «Россе хий» яхача болама доакъашхоша иштта толам баккхарах ГӀалгӀайчен Ӏалама министерствон болхлой а. 176 саг вӀашагӀкхийтар дӀадахача шера мехка хишца ювзаенна моттигаш цӀенъяра, цига 20,3 куб м. нувхаш гулйир. Цо хьагойт бахархоша цу деша терко еш хилар, цар экологически бехктокхам лакха хилар.
«Экологи» яхача къаман проекта чуйоагӀаш, дӀахьош йолча «Россе хий» яхача боламе дакъа лаца йиш йолаш ва хин таронаш лораяра, гонахьарча Ӏалама хьал тоадара сагота вола хӀара саг. ГӀалгӀайчен бахархоша дика дакъа лоац хиш цӀена, лостам болаш хилийтара дӀахьош болча балха.
