ГӀалгӀай фермерашта 70 млн совгӀа ахча деннад, гӀо деш
Укх шера вай мехкарча 46 юртбоахама моттигерча паччахьалкхено, гӀо деш, 70 млн совгӀа ахча деннад. Цу юкъе я Инаркъе, СоагӀапче, Эккажкъонгий-Юрт. Фермерий аьттув хургба керда боахамаш хьакхолларал совгӀа, хьайбаш дикка дебаде, хьабоаккхаш болча кхачан хӀама тоаде.
Хьайбай боахамаш доаржадара тӀехьа къоастаяь я «Агростартап» яха грант. Котбаьннараша доахан дебадара тӀехьа дӀадохийтаргда из ахча. Цул совгӀа, укх шера новкъостал дир 11 дезала фермашта.
Вай мехкадас Келаматанаькъан Махьмуд-Ӏаьлас белгалдир, хьайбаш дебар вай мехка лоархӀаме долга.
«ДӀадахача шера доахан 76,3 эзарга кхоачаш дийбар, дулхацара гӀулакх – 18 эзар тонн, шура - 149 эзар тонн. Паччахьалкхено фермерашта гӀо даро дикка тоадир цу оагӀонца дувзаденнараш», - теркалдир вай мехкадас.
Цул совгӀа, СВО ветеранашта гӀо дарах йолча «Агромотиватор» яхача федеральни программанна юкъеяхар вай республика. Хьайбаш дебарах болча балха 7 млн гаргга ахча эца йиш я цу программага гӀолла, 5 млн гаргга ахча цу оагӀонцарча кхыдарашта лаьрхӀа.
