Гӏалаш меттаоттаеш боахкача тӏоговзанчаша шоай болх мархаш дӏадаьлча дӏахохьоргба
Мархий кхаь дийнахьара цӏай чакхдаьлча, шоай болх дӏахохьоргба гӏалаш меттаоттаеш къахьегараша. Из хоам «Сердалога» бир «Тӏехьале» яхача тӏоговзанчий ишкола кулгалхо волча Султиганаькъан Рамзана.
«Лохера Пхьуй яхача гӏалай юрта шоай болх дӏахохьоргба болхлоша Рамадан бутт чакхбаьлча. ӏан хана лоаман моттигашка гӏор лаьттар, из бахьан долаш болх соцабир. Боаггӏача боараме дӏабахьа беза лоархӏаме болх ба из вай мехка», - дийцар тха газетага.
Дӏахо №1 йола нах бахаш хинна гӏала тоаеш хургба тӏоговзанчаш. Шин шера болхлоша кулг ца тохаш тӏахьожам лоаттабаьб цу гӏаланна, цу юкъа теркалдир, гӏала дӏахо тоаеш бола болх дӏаболабе йиш хилар.
«Лохера Пхьуй яхача гӏалай юртара вӏов меттаоттаеш хургба болхлой. Къаьстта уж гӏалаш меттаоттаяр геттара лоархӏаме да тхона, хӏана аьлча моастагӏашта духьале яь гӏалаш я уж», - дийцар Рамзана.
Хьалхагӏа «Сердалога» гӏолла оаха хоам баьбар, оагӏой бетта 31-ча дийнахьа Лохера Пхьуй яхача юртара нах бахаш хинна ши гӏала тоаяь яьннай, аьнна.
