30 шу дизар дездеш я паччахьалкхен университет
30 шу дизар дездеш я вай паччахьалкхен университет. Цига гулбенна хилар мехка паччахьалкхенна кулгал деш вола Сластенин Владимир, Халкъа Гуллама кулгалхочун гIонча йола Хьашанаькъан Аза, дешареи Iилмани гIулакхах йолча министерствон хьалхалатта Боканаькъан Аьсет, Iилма-тохкама института кулгалхо вола Харсенаькъан Борис, кхыча моттигашкара болхлой.
«Атта боаца, боккха никъ ба вузо хьабенар. 30 шу яхар дукха ха еце а, цу шерашка хьадаьраш дагалаца эттача, хьинарах, къахьегамах бизза никъ ба укх денга кхоачаш хьабенар. Керттердар - дIахойодача хана а, лакха толамаш доахаш, вуза дIаяха низ кхачар. Университета ректор йола Iалбаканаькъан Фатима хьинаре болх дIабахьа лаьрхIа я ший тоабанца, университета хьал хIара шера дикагIа тоадеш. Тахан вай университете дешаш ба, кхыча моттигашкара санна, кхыча мехкашкара а кагирхой», - дийцар гулбеннарашка Сластенин Владимира.
Иштта цо дийшар, мехкадас Келаматанаькъан Махьмуд-Iаьлас университета тоаба даькъалаювцаш, цар хьабенача балха наькъа лакха мах беш, дайта каьхат.
Тахан гIалгIай паччахьалкхен университете тайп-тайпара дешара оагIонаш чулоацаш дIахьош латтар боккха болх ба. Россе цIихезача вузашкара баьхка хьехархой ба укхаза лекцеш ешаш, лоархIамеча лакхаленашка кхоачаш, Iилман балхаш дIакхухьаш къахьегаш ба университете дийша арабаьннараш. Беркате, иразе хилба цар никъ!
