ГӀорваьннача гӀишлонхочун 70 шу дизад
Укх деношка газета редакце вена хилар, вай республике а цул гаьнна арахьа а вовзаш вола гӀишлонхо ТӀолданаькъан Османа Идрис. Дукха ха я вай мехкара лоархӀаме гӀишлош хьае из волавенна. Дуккхача, лоархӀамеча моттигашка къахьегаш хиннав из а цунцара тайп-тайпара кулгаговзалаш йола болхлой а. Цо хьалдаьд Россе доазон тӀа нах баха цӀенош, ишколаш, банкаш, кирпишк ю заводаш, «Декор» яха гӀишлонхой цхьанкхетар, царех тарра кхыйола моттигаш. Цул совгӀа, республикан юкъарча вахара а ший дакъа юкъедихьад цо. Дукха рузкъа тийннад маьждигаш деча, совгӀата машинаш а премеш а тийннай вай футболисташта. Белагалдаккха деза, цхьан юкъа из «Ангушт» оалача вай футболистий керттерча тоабан президент хиннилга а.
Доккхий паччахьалкхен совгӀаташ а цӀераш а тийннай Османа Идриса цо хьийгача къих а карагӀдийннача гӀулакхех а. Царех я «ГӀалгӀай Республикан гӀорваьнна гӀишлонхо», «Россе сийдола гӀишлонхо» яха а кхыйола а цӀераш. Цунна деннад вай республикан эггара дезагӀа дола совгӀат «КарагӀдаьннарех» яха орден. Идрис юкъарлон Академе член-корреспонденталла а сийдолча академика дарже а хийржа хиннав.
Карарча шера 70 шу дизад вай мехкахочун. Цу доккхача таьрахьаца из даькъалавувца лов. Цун говзал кхы а дуккхача шерашка дикаш кхоллача накъаяргья, аьнна, хет, вай республике а цул арахьа а.
