Лоамарой халхара йиш дӀаязъяь композитор
Балакирев Милий Алексеевича 185 дизарга
Массанена дукха езаш а, каст-каста хозаш а я лоамарой халхара йиш. Дуккхачар цун мукъамца халхара бӀал баьккха а хургба, вай мехка cаг йоагӀача, йодача ловзар хилар бахьан долаш. Бакъда дуккхачарна хац из йиш ноташ тӀа дӀа а язъяь, дерригача дуненна дӀайовзийтар эрсий композитор Балакирев Милий Алексеевич волга. Хетаргахьа, цунна дукха езаш хиннай Кавказ, цун сийна лоамаш, кхыдола Ӏалама сурташ. ЛаьрххӀа лоамарой мехка вена а, из бӀаргабайна а хиннав Милий Алексеевич.
Мичара хиннав из ше, мишта хиннад цун вахара шераш? Балакирев ваь хиннав 1836 шера декабрь бетта 21-ча дийнахьа (1937, 2 январь) Нижни Новгороде. ЗӀамига волча хана денз, яьшкпандар (фортепьяно) лакха Ӏомавеш, цунца къахьийгад нанас. Иштта тайп-тайпарча ашархоша урокаш луш хиннай цунна, кхувш воагӀача хана, дӀахо цо дийша хиннад Москверча а Нижни Новгородерча а ашарий доврянски институте. Казанерча университета математически факультета хьехархошка ладувгӀа ухаш а хиннав из. Ше а, ашарий урокаш телаш, къахьийгад цо. Цунна вовзаш хиннав гӀорваьнна эрсий композитор М. И. Глинка.
Балакирева а цун новкъосташа а Питере хьайийлла хиннай, берашта лаьрхӀа йола, мах тела ца беза ашарий школа. Цун директор волаш, цхьа ха яьккхай цо. Цул совгӀа, из паччахьан копелланна кулгал деш а хиннав.
Балакиревс дӀаязъяь лезгинка шерра йовзаш я вай мехка а цул арахьа а. Цох пайда ийцаб дуккхача культуран вӀашагӀкхетарашка, цӀайшка, концерташка. Кхыметтел кинорежжисёраша а шоай исбахьален фильмашта юкъекхихьай из, цо уж хоздергдолга ховш. Масала, С. Жгенте сценарех режиссёра Резо Чхеидзес даьккхад «Салтечун да» яха кинофильм, Махарашвиле роль ловзаеш ва Закариадзе Серго. Цу фильман хозагӀйолча моттигех цаӀ я, артисташ тӀем тӀа бахкар, ловзар оттадар. Цига екар я Милий Алексеевича дӀаязъяь лоамарой халхара йиш.
Балакирев кхелхав 1910 шера, амма цо дӀаязъяьча лоамарой халхара ашаро даим а дагалоаттавергва из Кавказерча къамий культура, ашараш, халхараш мел дезача наха.
