ЛийрхӀар хиннадац, дегӀар мара
ЦӀермашений кердача вокзала вахарах лаьца
Укх шера нийсса 25 шу дуз, вай республике дуне миссел йоккха цӀермашений вокзал хьалъяь. Керда хьахиннача республике эггара хьалха хьалъяьча гӀишлонех цаӀ я из. Из еш латташ, цига хинна а шедар сай бӀаргашца бӀаргадайна а ва со. Дукха томаш йола сома книжка санна яр, Словакерча Нитра яхача шахьар тӀарча архитектораша оттаяь хинна цун проект. Из Ӏомае, кхетае сахьаташ а доахаш вагӀа везар. Из еррига чоалх вӀашагӀйоллаш хиннараш а цу гӀалий тӀара гӀишлонхой бар. Чура чувоалаш массийтта блок яр вокзала чуйоагӀаш. Цар тхов кӀалха хила дезаш дар наькъа арабаьннача наьха хьашташ кхоачащдергдола шедола хӀама. Масала, ден-бус болх беш йола йиъ касса, мухь дӀачутела отделени, почтамт, шахьарашта юкъе бувзам лоаттабу телефонни станци, ресторан, лорий кабинет, наьнеи береи цӀа, кӀаьдвалар (психически Ӏоткъам) дӀадоаккхаш, син сатем бахьаш йола кабинет, кхыдараш.
Оалаш ма хиллара, лийрхӀар хиннадац дегӀар мара. Ший ткъаь пхе шерага вокзал кхаьчача хана, лакхе дийцарех дуккхадараш укхаза доацаш да. Хетаргахьа, из дувзаденна да дуккха нах тӀа ца латтандаь. ХӀанзарчоа укх новкъа лелар Наьсаре-Москва оала цхьа цӀермашен мара яц. Из лела йолаеннай, 2014 шера денз. Бакъда сентябрь бетта Наьсаре-Минводы яха сиха лела цӀермашен а хургья яхаш да, укхаза хозаш дола къамаьл. Из «ЧӀагарг» аьнна цӀи йола цӀермашен Москве ухар санна Россе столицан цӀерагӀа лелаш хургья.
2019 шера кхаччалца, цӀермашена вокзал ювцача гӀишлон чу арендах Ӏеш яр, Росимуществон мах телаш. Цу шера 1100 квадратни метр наха Ӏеш йола зал, мах тела безаргбоацаш, вокзала доалахьа хьаеннай. Цига денз дӀа мел ийккха хӀама цӀермашена вокзала кулгалхой доалахьа дац укхаза. Ала деза цун тайп-тайпарча блокашка 19 организаци Ӏеш я аьнна. Масала, царех я Росимущество, Наьсарен райсовет, КПРФ вай республикера отделени, кхыяраш.
-Из зал тхоай доалахьа хьаенначул тӀехьагӀа, — йоах вокзала кулгалхочо КӀаценаькъан Мурада ИбрахӀима, — оаха тоадайтад наьнеи береи цӀа, хӀанз цу чу мебель оттае еза тха. Лифт тоаяьй, кулг-юхь дилара, аравахара эша моттигаш меттайоалаяьй, 70 процент пандусаш яь яьннай. Иштта дийнахьа болх беш ши касса я, дукха ха йоацаш хьайийллай къаман даараш кийчдеш йола кафе. ХӀанз перронаш тоае лаьрхӀа да тхо.
ИбрахӀима укхаза болх бу дукха ха я, къаьнара вокзал йолча хана денз (1995). ХӀанз ялхлагӀа шу да из укхаза хьаким вола. Верригаш цун карара болхлой 15 саг ва. Москве уха цӀермашен кхыча организацена чуйоагӀаш я. Укхаза я АО ФПК — федеральни пассажирий компани оала акционерий юкъарло, цун даьй Москве багӀа, хӀаьта вайцигарча филиала керте латт Оздой Асхьаба Лом-Ӏаьла. Ди юккъа ухаш йолча цу цӀермашенаца болх беш 54 саг ва. Кулгалхочо яхачох, уж берригаш цхьатарра дика къахьегаш, шоаех гӀалат ца доаккхийташ хьабоагӀа. Царех я Котаганаькъан Ахьмада Хьава, Боканаькъан Мухьмада Рукъет, Бабхой Башира Танзила, Мираненко Галина Викторовна, кхыбараш.
— ЦӀермашен ди юккъа цаӀ мара ца леле, Наьсарера переезд каст-кастта къайла хӀана хул? — хаьттар аз Мурада ИбрахӀимга.
-Мухь кхухьа цӀерашенаш лел укхаза, уж Прохладнера, Берса-Юртара йоагӀаш хул е Сипсой-ГӀалий тӀа е Илдарха-ГӀалий тӀа кхача дагахьа. Ден-бус бархӀ пара хила тарлу уж. Цудухьа къувлаш я переезд.
Иштта да таханарча дийнахьа цӀермашений керттерча вокзала вахар. Ткъаь пхиъ шу дукха ха ала йиш яц, бакъда кӀезига ха а яц из. Вокзала хьалаш кхы а дикагӀа хиларга сатувса лов. ЦӀермашенаш дукхагӀа лела яьлча, адамаш дукхагӀа тӀалатташ хилча, тоадала мегаш хӀамаш да уж а.
